ສົນທະນາທົ່ວໄປ

ພິທີ​ປະກາດ​ການ​ແຕ່ງຕັ້ງ​ຜູ້​ຮັກສາ​ການ​ຊົ່ວຄາວ ເລຂາ​ຄະນະ​ບໍລິຫານ​ງານ​ພັກ​ກະຊວງ​ປ້ອງ​ກັນ​ຄວາມ​ສະຫງົບ ແລະ ຜູ້​ຮັກສາ​ການ​ຊົ່ວຄາວ ລັດຖະມົນຕີ​ວ່າການ​ກະຊວງ​ປ້ອງ​ກັນ​ຄວາມ​ສະຫງົບ ໄດ້​ມີ​ຂຶ້ນ​ວັນ​ທີ 30 ພຶດສະພາ 2014 ຢູ່​ກະຊວງ​ປ້ອງ​ກັນ​ຄວາມ​ສະຫງົບ ໂດຍ​ມີ​ສະຫາຍ ຈັນ​ສີ ໂພ​ສີຄຳ ເລຂາທິການ​ສູນ​ກາງ​ພັກ ຫົວໜ້າ​ຄະນະ​ຈັດ​ຕັ້ງ​ສູນ​ກາງ​ພັກ ມີ​ຄະນະ​ນຳ ພະນັກງານ​ຫຼັກ​ແຫຼ່ງ​ອ້ອມ​ຂ້າງ​ກະຊວງ​ປ້ອງ​ກັນ​ຄວາມ​ສະຫງົບ ແລະ ແຂກ​ຖືກ​ເຊີນ​ເຂົ້າ​ຮ່ວມ.

ພິທີ​ປະກາດ​ການ​ແຕ່ງຕັ້ງ​ຄັ້ງ​ນີ້ ແມ່ນ​ໄດ້​ຕົກລົງ​ແຕ່ງຕັ້ງ​ສະຫາຍ ພົນ​ຈັດຕະວາ ສົມ​ແກ້ວ ສີ​ລາ​ວົງ ກຳມະການ​ສູນ​ກາງ​ພັກ ເປັນ​ຜູ້​ຮັກສາ​ການ​ຊົ່ວຄາວ ເລຂາ​ຄະນະ​ບໍລິຫານ​ງານ​ພັກ ກະຊວງ​ປ້ອງ​ກັນ​ຄວາມ​ສະຫງົບ ແລະ ເປັນ​ຜູ້​ຮັກສາ​ການ​ຊົ່ວຄາວ ລັດຖະມົນຕີ​ວ່າການ​ກະຊວງ​ປ້ອງ​ກັນ​ຄວາມ​ສະຫງົບ ທັງ​ນີ້​ກໍ່​ເພື່ອ​ແນໃສ່​ໃຫ້​ມີ​ຜູ້​ຊີ້​ນຳ-ນຳພາ ແລະ ຄຸ້ມ​ຄອງ​ບັນຊາ​ວຽກ​ງານ​ຮອບດ້ານ ຂອງ​ກະຊວງ​ປ້ອງ​ກັນ​ຄວາມ​ສະຫງົບ ເຮັດ​ໃຫ້​ວຽກ​ງານ​ໄດ້​ເຄື່ອນ​ໄຫວ ແລະ ດຳເນີນ​ໄປ​ຢ່າງ​ເປັນ​ປົກກະຕິ.

ການ​ປະກາດ​ແຕ່ງຕັ້ງ​ຄັ້ງ​ນີ້ ແມ່ນ​ປະຕິບັດ​ຕາມ​ມະຕິ​ຕົກລົງ​ຂອງ​ຄະນະ​ເລຂາທິການ​ສູນ​ກາງ​ພັກ ສະບັບ​ເລກ​ທີ 55/​ຄລສພ ລົງ​ວັນ​ທີ 21 ພຶດສະພາ 2014 ວ່າ​ດ້ວຍ​ການ​ບົ່ງ​ຕົວ​ແຕ່ງຕັ້ງ​ຜູ້​ຮັກສາ​ການ​ຊົ່ວຄາວ ເລຂາ​ຄະນະ​ບໍລິຫານ​ງານ​ພັກ ຜູ້​ຮັກສາ​ການ​ຊົ່ວຄາວ ເລຂາ​ຄະນະ​ບໍລິຫານ​ງານ​ພັກ ກະຊວງ​ປ້ອງ​ກັນ​ຄວາມ​ສະຫງົບ ດຳລັດ​ຂອງ​ນາຍົກລັດຖະມົນຕີ ສະບັບ​ເລກ​ທີ 186/​ນຍ ລົງ​ວັນ​ທີ 29 ພຶດສະພາ 2014 ວ່າ​ດ້ວຍ​ການ​ແຕ່ງຕັ້ງ​ຜູ້​ຮັກສາ​ການ​ຊົ່ວຄາວ ລັດຖະມົນຕີ​ວ່າການ​ກະຊວງ​ປ້ອງ​ກັນ​ຄວາມ​ສະຫງົບ ອີງໃສ່​ຄວາມ​ຮຽກຮ້ອງ​ຕ້ອງການ​ຂອງ​ໜ້າທີ່​ວຽກ​ງານ​ອັນ​ຈຳເປັນ ແລະ ເລັ່ງ​ດ່ວນ​ຢູ່​ກະຊວງ​ປ້ອງ​ກັນ​ຄວາມ​ສະຫງົບ ແລະ ກົດ​ລະບຽບ​ພັກ​ປະຊາຊົນ​ປະຕິວັດ​ລາວ ສະໄໝ​ທີ IX ໝວດ​ທີ II ມາດຕາ 8 ຂໍ້ 1 ການ​ຊີ້​ນຳ​ຂອງ​ກົມ​ການເມືອງ ແລະ ຄະນະ​ເລຂາທິການ​ສູນ​ກາງ​ພັກ ແລະ ອີງ​ຕາມ​ການ​ສະເໜີ​ຂອງ​ຄະນະ​ຈັດ​ຕັ້ງ​ສູນ​ກາງ​ພັກ ສະບັບ​ເລກ​ທີ 150/​ຄຈສພ ລົງ​ວັນ​ທີ 28 ພຶດສະພາ 2014.