ຫຼາຍປີມານີ້ລັດຖະບານໄດ້ສັ່ງຢຸດ ການສົ່ງອອກໄມ້ທ່ອນໄປຍັງຕະຫຼາດຕ່າງປະເທດ ໂດຍອະນຸຍາດໃຫ້ສົ່ງອອກ ພຽງຜະລິດຕະພັນໄມ້ທີ່ສຳເລັດຮູູບເທົ່າ ນັ້ນເພື່ອເພີ່ມມູນຄ່າຂອງສິນຄ້າ ຢ່າງໃດກໍຕາມ ການສັ່ງຢຸດດັ່ງກ່າວຂອດການຈັດຕັ້ງປະຕິບັດຂອງພະນັກງານບາງ ເຂດຍັງບໍ່ທັນເຂັ້ມງວດດີ ອັນໄດ້ເກີດມີຫຼາຍຫາງສຽງໄປໃນທາງແລວລົບ ຂະນະທີ່ໃນກອງປະຊຸມລັດຖະບານ ໄດ້ເນັ້ນໃຫ້ເອົາໃຈປະຕິບັດແຈ້ງການກ່ຽວກັບທິດຊີ້ນຳຂອງກົມ ການເມືອງຕໍ່ວຽກງານທຸລະກິດໄມ້ຫວງຫ້າມ.
ກ່ອນປິດກອງປະຊຸມລັດຖະບານສະ ໄໝສາມັນປະຈຳເດືອນກຸມພາ 2014 ທີ່ຈັດຂຶ້ນໃນລະຫວ່າງວັນທີ 1011 ຜ່ານມາ ສຳລັບວຽກຈຸດສຸມທີສອງໃນເດືອນນີ້ ແລະ ເດືອນໜ້າທີ່ທ່ານ ທອງສິງ ທຳມະວົງ ນາຍົກລັດຖະມົນຕີ ໄດ້ເນັ້ນໃຫ້ບັນດາກະຊວງ ແລະ ອົງການຕ່າງໆແມ່ນໃຫ້ເອົາໃສ່ຈັດຕັ້ງນຳພາການພັດທະນາເສດຖະກິດ, ຊຸກຍູ້ການຈັດເກັບລາຍຮັບເຂົ້າງົບປະມານ ແລະ ເອົາໃຈໃສ່ຄຸ້ມຄອງເສດຖະກິດມະຫາພາກໃນເງື່ອນໄຂທີ່ຫຍຸ້ງຍາກໃຫ້ດີ ແລະ ເປັນຮູບປະທຳຫຼາຍຂຶ້ນ ໜຶ່ງໃນນັ້ນ ເນັ້ນໃຫ້ເອົາໃຈໃສ່ປະຕິບັດແຈ້ງການຂອງຫ້ອງວ່າການສູນກາງພັກກ່ຽວ ກັບການຊີ້ນຳຂອງກົມການເມືອງຕໍ່ກັບວຽກງານທຸລະກິດໄມ້.
ຂະນະທີ່ແຈ້ງການດັ່ງກ່າວລົງສະບັບ ເລກທີ 60/ຫສພ ວັນທີ 5 ກຸມພາ 2014 ໄດ້ໃຫ້ທິດຊີ້ນຳລັດຖະບານທັງໝົດ 7 ຂໍ້ສຳລັບຂໍ້ທີ 2 ບໍ່ເຫັນດີໃຫ້ສົ່ງອອກໄມ້ທ່ອນ, ໄມ້ຕັບ, ໄມ້ເລື່ອຍ, ຕໍໄມ້, ປູດໄມ້, ໄມ້ເຄິ່ງສຳເລັດຮູບ ແລະ ໄມ້ປະດັບອອກຕ່າງປະເທດ, ໃຫ້ປຸງແຕ່ງເປັນຜະລິດຕະພັນແລ້ວຈິ່ງສົ່ງອອກ ແລະ ບໍ່ໃຫ້ອີງໃສ່ການຂຸດຄົ້ນຊັບພະຍາກອນໄມ້ ແລະ ສ້າງລາຍຮັບເຂົ້າງົບປະມານເປັນຕົ້ນຕໍ, ສ່ວນຂໍ້ 4 ໃຫ້ດຳເນີນການກວດກາອຳນາດການປົກຄອງແຂວງ, ເມືອງ ແລະ ຮາກຖານບ້ານເປັນປົກກະຕິ ແລະ ຖ້າເຫັນວ່າບ່ອນໃດມີການສົມຮູ້ຮ່ວມຄິດ ເພື່ອຂຸດຄົ້ນ ແລະ ຊື້ຂາຍໄມ້ແບບຜິດກົດໝາຍແມ່ນໃຫ້ສຳຫຼວດກວດກາລົງວິໄນຢ່າງເຂັ້ມ ງວດ.
ໃຫ້ດຳເນີນກວດກາບັນດາດ່ານໃນທົ່ວປະເທດ ແລະ ຖ້າບ່ອນໃດມີການສົມຮູ້ຮ່ວມຄິດ ແລະ ອະນຸຍາດໃຫ້ນຳໄມ້ອອກແບບຜິດກົດໝາຍແມ່ນໃຫ້ດຳເນີນການສຳຫຼວດ ກວດກາລົງວິໄນ ແລະ ຍົກຍ້າຍພະນັກງານທີ່ກະທຳຜິດດັ່ງກ່າວນີ້ ແມ່ນກຳນົດໃນຂໍ້ທີ 5 ສ່ວນໂຮງງານປຸ່ງແຕ່ງໄມ້ ແລະ ໂຮງງານເຟີນິເຈີໃນທົ່ວປະເທດຂໍ້ 6 ກໍເນັ້ນໃຫ້ກວດກາຖ້າເຫັນບ່ອນໃດບໍ່ໄດ້ມາດຕະຖານແມ່ນໃຫ້ຢຸດເຊົາ ກິດຈະການຢ່າງຂາດຕົວ ໂດຍຂໍ້ສຸດທ້າຍເນັ້ນ ສະເພາະພໍ່ຄ້ານັກທຸລະກິດທັງພາຍໃນ ແລະ ຕ່າງປະເທດທີ່ດຳເນີນການທຸລະກິດຊື້ຂາຍໄມ້ແບບຜິດກົດໝາຍແມ່ນໃຫ້ ດຳເນີນຄະດີຕາມລະບຽບກົດໝາຍຢ່າງເຂັ້ມງວດເຊັ່ນດຽວກັນ.
