ພິທີພົບປະໃນໂອກາດປີໃໝ່ຂອງກຸ່ມນັກທຸລະກິດຫວຽດນາມຢູ່ລາວ ໄດ້ມີຂຶ້ນໃນວັນທີ 3 ມີນານີ້ ທີ່ນະຄອນຫຼວງວຽງຈັນ ໂດຍສະຖານທູດຫວຽດນາມເປັນຜູ້ຈັດຂຶ້ນ ຊຶ່ງມີຜູ້ຕາງໜ້າຈາກ 50 ກວ່າຫົວໜ່ວຍທຸລະກິດຫວຽດນາມຢູ່ລາວເຂົ້າຮ່ວມ.
ໃນການພົບປະດັ່ງກ່າວໄດ້ຊີ້ໃຫ້ເຫັນວ່າ: ປັດຈຸບັນບັນດາຫົວໜ່ວຍທຸລະກິດ ສສ.ຫວຽດນາມ ໄດ້ເຂົ້າມາລົງທຶນຢູ່ລາວ ມີຈຳນວນ 412 ໂຄງການ ມີມູນຄ່າທັງໝົດຫຼາຍກວ່າ 5 ຕື້ໂດລາສະຫະລັດ ຫຼື ປະມານ 40.000 ຕື້ກີບ ຈັດຢູ່ອັນດັບສາມຂອງບັນດາປະເທດ ແລະ ເຂດແຄວ້ນຕ່າງໆທີ່ເຂົ້າມາລົງທຶນຢູ່ລາວ ໂຄງການລົງທຶນດັ່ງກ່າວ ສ່ວນໃຫຍ່ຈະເປັນຂົງເຂດບໍ່ແຮ່ ພະລັງງານໄຟຟ້າ ກະສິກຳ ການບໍລິການ ການກໍ່ສ້າງ ທະນາຄານ ແລະ ການປະກັນໄພ ສະເພາະປີ 2013 ຜ່ານມາ ຫວຽດນາມໄດ້ເຂົ້າມາລົງທຶນຢູ່ລາວ ຈຳນວນ 12 ໂຄງການ ລວມມີມູນຄ່າ 138 ລ້ານໂດລາສະຫະລັດ ຫຼື ປະມານຫຼາຍກວ່າ 1.100 ຕື້ກີບ.
ກອງປະຊຸມຍັງຍົກໃຫ້ເຫັນວ່າ: ຄຽງຄູ່ກັບຈຸດດີອັນເປັນພື້ນຖານດັ່ງກ່າວ ບັນດານັກທຸລະກິດຫວຽດນາມນຳສະເໜີວ່າ ນັບແຕ່ປີໃໝ່ນີ້ເປັນຕົ້ນໄປ ຊາວຫວຽດນາມຕ່າງດ້າວໃນລາວ ຈະຕ້ອງໄດ້ອອກແຮງຕື່ມອີກ ໃນການເຄື່ອນໄຫວປະສານງານກັບ ບັນດາຫົວໜ່ວຍທຸລະກິດຫວຽດນາມໃນລາວ ແລະ ສິ່ງນີ້ຈະຕ້ອງໄດ້ເຮັດເປັນປະຈຳ ແລະ ເປັນບໍລິເວນກວ້າງໃນທົ່ວປະເທດ ສ້າງເງື່ອນໄຂໃຫ້ຫົວໜ່ວຍທຸລະກິດ ຢູ່ຕາມທ້ອງຖິ່ນຂອງລາວ ໄດ້ມີໂອກາດພົບປະແລກປ່ຽນບົດຮຽນ ແລະ ປະສົບການຕ່າງໆນຳກັນ ເພື່ອສາມາດປັບປຸງຕົນເອງໃຫ້ມີຄວາມເຂັ້ມແຂງ ພ້ອມນັ້ນ ກໍ່ຈະຕ້ອງໄດ້ເພີ່ມທະວີການແລກປ່ຽນຂໍ້ມູນຂ່າວສານຊຶ່ງກັນ ແລະ ກັນໃຫ້ຫຼາຍຂຶ້ນ ກະຕຸກຊຸກຍູ້ ແລະ ຊ່ວຍເຫຼືອກັນໃຫ້ສາມາດເຂົ້າເຖິງການຕະຫຼາດ ເພື່ອເຮັດແນວໃດ ສາມາດຍົກສູງຕົວເລກການພົວພັນແລກປ່ຽນສິນຄ້າ ລະຫວ່າງສອງຝ່າຍ ລາວ-ຫວຽດນາມ ຮອດປີ 2015 ໃຫ້ບັນລຸໄດ້ 2 ຕື້ໂດລາ ແລະ ໃນໂອກາດນີ້ ບັນດານັກທຸລະກິດຫວຽດນາມ ກໍ່ໄດ້ນຳສະເໜີບາງບັນຫາທີ່ເປັນອຸປະສັກ ແລະ ຄວາມຫຍຸ້ງຍາກ ເພື່ອລັດຖະບານສອງປະເທດຮ່ວມກັນ ປັບປຸງແກ້ໄຂເພື່ອກະຕຸກຊຸກຍູ້ການພົວພັນຮ່ວມມື ແລະ ການລົງທຶນລະຫວ່າງສອງຝ່າຍນັບມື້ກ້າວສູ່ຈຸດສູງ.
ໃນການພົບປະດັ່ງກ່າວ ທ່ານເອກອັກຄະລັດຖະທູດ ສສ.ຫວຽດນາມ ປະຈຳລາວ ຫງວຽນແມັງຮຸ່ງ ກໍ່ມີຄຳເຫັນສະແດງຄວາມຊົມເຊີຍ ແລະ ຕີລາຄາສູງຕໍ່ໝາກຜົນການເຄື່ອນໄຫວວຽກງານ ຂອງບັນດາຫົວໜ່ວຍທຸລະກິດຕ່າງໆຂອງຫວຽດນາມຢູ່ລາວ ຍາດມາໄດ້ ແລະ ສາມາດຜ່ານຜ່າຄວາມຫຍຸ້ງຍາກ ແລະ ອຸປະສັກຕ່າງໆ ກະຕຸກຊຸກຍູ້ໃຫ້ການພົວພັນຮ່ວມມື ລະຫວ່າງສອງຝ່າຍນັບມື້ຂະຫຍາຍຕົວ ແລະ ພ້ອມນັ້ນ ທ່ານທູດກໍ່ໄດ້ເນັ້ນຕື່ມໃຫ້ບັນດາຫົວໜ່ວຍທຸລະກິດດັ່ງກ່າວ ເພີ່ມທະວີຄວາມພະຍາຍາມ ແລະ ເປັນເຈົ້າການ ຈັດຕັ້ງປະຕິບັດໂຄງການລົງທຶນຂອງຕົນຢູ່ລາວ ໃຫ້ມີປະສິດທິຜົນສູງສຸດ ແລະ ເອົາໃຈໃສ່ປະຕິບັດລະບຽບກົດໝາຍຂອງລາວ ເພື່ອນ້ຳໃຈຮັບຜິດຊອບຕໍ່ໜ້າທີ່ວຽກງານ ແລະ ການເພີ່ມພູນຄູນສ້າງສາຍພົວພັນທີ່ເປັນມູນເຊື້ອ ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ນັບມື້ແຕກດອກອອກຜົນງອກງາມຍິ່ງໆຂຶ້ນ.
